Olíugróði Drekasvæðis skattlagður um allt að 59%

Íslenska ríkið stígur fyrsta skrefið inn í hinn alþjóðlega olíuheim þann 15. janúar næstkomandi þegar útboð hefst á réttindum til leitar og vinnslu á Drekasvæðinu. Vegna þessa lögfesti Alþingi í gær þá umgjörð sem verður um málaflokkinn en samkvæmt henni er Orkustofnun falið að halda utan um kolvetnisvinnsluna, það er vinnslu á olíu og gasi. Ríkinu verður heimilað að stofna hlutafélag um olíuvinnslu, þó ekki félag í líkingu við hið norska Statoil, því hlutafélaginu verður óheimilt að starfa sem vinnslufyrirtæki, heldur er því einkum ætlað að halda utan um hagsmuni Íslands á norska hluta Drekasvæðisins. Þá er búist við að Alþingi lögfesti á morgun sérlög um skattlagningu olíu- og gasvinnslu. Lagt verður á vinnslugjald, sem á fyrstu 20 milljónir tunna verður 5% en fer síðan stighækkandi allt upp í 58% af verðmæti. Vinnslugjaldið fellur svo niður og við tekur kolvetnisskattur þegar hagnaður vinnslunnar er kominn yfir 20% af tekjum, og verður fyrst 5,5 prósent. Skatturinn fer síðan stighækkandi eftir því sem hagnaðurinn eykst allt upp í 44 prósent af tekjum. Því til viðbótar bætist síðan 15% tekjuskattur þannig að ríkið fengi þá allt að 59 prósent af tekjunum. Í Noregi fer skattheimtan allt upp í 78 prósent af hagnaði en samkvæmt upplýsingum frá Orkustofnun var ákveðið að hafa þetta ívið lægra hérlendis og taka í þeim efnum fremur mið af skattareglum í Kanda og Færeyjum.