Þingmenn Samfylkingarinnar vilja einnig kosningar á næsta ári

Að minnsta kosti fjórir þingmenn og tveir ráðherrar Samfylkingarinnar vilja að gengið verði til kosninga á næsta ári. Þórunn Sveinbjarnardóttir, umhverfisráðherra, sagði í samtali við Vísi í dag að atburðir síðustu daga og vikna vera þeirra gerðar að þeir sem komi að uppbyggingarstarfinu verði að hafa til þess skýrt umboð.

Í framhaldinu sendi Vísir fyrirspurn á þingmenn Samfylkingarinnar þar spurt var um afstöðu þeirra varðandi málið og svöruðu þrír þingmenn í dag. Ellert B. Schram, Steinunn Valdís Óskarsdóttir og Katrín Júlíusdóttir. Öll eru þau fylgjandi kosningum á næsta ári. Áður hafði Ágúst Ólafur Ágústsson, varaformaður Samfylkingarinnar, sagt í Silfri Egils að kjósa eigi á nýjan leik.

Þá hefur Björgvin G. Sigurðsson, viðskiptaráðherra líst því yfir að flýta eigi kosningum og vill hann að kosið verði til Alþingis næsta vor.

Kosningar eru óhjákvæmilegar og eðlilegar á fyrri hluta næsta árs eða í síðasta lagi í vor, að mati Ellerts.

,,Ég talaði fyrir kosningum á vormánuðum í morgunútvarpi Bylgjunnar á mánudaginn. Fagna öllum sem eru mér sammála um það," sagði Steinunn Valdís.

Katrín kvaðst vera þeirra skoðunar að kosningar eigi að fara fram í vor. Hún sagðist hafa líst þessari skoðun sinni yfir á aðalfundi Samfylkingarfélagsins í Garðabæ í gærkvöld. Fyrir því séu tvær ástæður. ,,Kjörnir fulltrúar þurfa endurnýjað umboð í ljósi gerbreyttra verkefna og breyta þarf stjórnarskránni vegna mögulegrar ESB - aðildar."