Texti við nýtt Baggalútslag þykir senda undarleg skilaboð

Nýtt lag Baggalúts, Þjóðhátíð '93, hefur vakið sterk viðbrögð fyrir nokkuð opinskáan texta um fyllirí og kynlífsfarir. Segir meðal annars í textanum: „Kengdrukknar kellingar kaffæra Herjólfsdal - þrjá daga á ári. Slíkt ber að nýta sér. Því skaltu flýta þér og reyna að góma eitt grey meðan þær geta ekki synt á brott úr Heimaey."

„Þetta er fullmikið af hinu góða," segir Hjálmar Sigmarsson, ráðskona Karlahóps Femínistafélags Íslands. Hjálmar segir textann endurspegla hluta af vandamálinu sem bent hafi verið á. „Endalaust er verið að senda þau skilaboð og tala um nauðganir sem hluta af verslunarmannahelginni sem þær eiga auðvitað ekki að vera. Á meðan við erum að senda frá okkur svona skilaboð þá halda nauðganir áfram að vera hluti af okkar hversdagsleika."

Ætti ekki að gera grín að nauðgunum

Hjálmar segir textann boða lítið annað en kvenfyrirlitningu og beinlínis lögbrot enda sé það bannað með lögum að nýta sér annarlegt ástand. „Þetta eru undarleg skilaboð í alla staði og stangast á við kynfrelsi beggja kynja. Ég sé ekki hæðnina né grínið. Er verið að gera grín að nauðgaranum? Hvað er þá svona fyndið við nauðgara eða nauðgun?," spyr Hjálmar.

Að mati Hjálmars er skrýtið að gera slíkt lag undir skjóli hæðni eða gríns. Hann segir hæðni trompkort sem sé notað of mikið og af því að þetta er grín þá á þetta að vera í lagi. Hjálmar vill hins vegar ögra þeirri hugmynd enda nái þemað grín ekki utan um nauðganir.

Ekki beint ætlunin að móðga neinn

„Þetta er nú ekki alveg það gróft," sagði Bragi Valdimar Skúlason, höfundur textans, þegar Vísir hafði samband við hann. „Ég hef mér ekkert til málsbóta annað en að það sé margt verra í heiminum en það sem er lýst í textanum."

Hann tekur hins vegar skýrt fram að hvergi sé minnst á nauðganir í textanum og að Baggalútur myndi aldrei tala fyrir þeim.

„Það var svo sem ekki ætlunin að mógða neinn, ekki beint. En það er ágætt að vita að það er ennþá hægt að stuða einhvern með ekki grófari munnsöfnuð en þetta."