Halldór: Fer ekki burt úr starfi með fúlgur fjár

Halldór J. Kristjánsson, fyrrverandi bankastjóri Landsbankans, segist ekki vera að hverfa frá starfi sínu með fúlgur fjár og telur sig ekki bera ábyrgð á því hvernig fór fyrir bankanum. Hann segir enn fremur að breska og íslenska fjármálaeftirlitið hafi komið að vinnu á þessu ári sem sneru að nýrri stöðu Icesave-reikninga Landsbankans.

Halldór var gestur í þætti Björns Inga Hrafnssonar, Markaðnum á Stöð 2 í morgun. Þar var farið yfir fall Landsbankans og aðdragana þess. Halldór sagði að sér þætti mjög miður að fjöldi fólks og fyrirtækja skyldu tapa fjármagni á falli bankans en taldi aðspurður að hann sem bankastjóri bæri ekki ábyrgð á fallinu. Við værum að takast við afleiðingar af dýpstu fjármálakreppu allra tíma og það hafi enginn geta séð fyrir að svona færi.

Bankarnir byggðu upp stóra atvinnugrein

Hann bendir á að íslensku bankarnir hafi verið búnir að byggja upp stærstu atvinnugrein landsins og gert Ísland að fjármálamiðstöð. Hér hafi verið sköpuð hálaunastörf og skattgreiðslur hafi aukist. Byggð hafi verið upp mjög stór og myndarleg atvinnugrein og honum finnist sorglegast að það hafi ekki tekist að verja hana falli.

Um bónusgreiðslur til stjórnenda bankanna sagði Halldór að menn hefðu vafalaust farið of geyst. Það hefðu verið greiddir háir bónusar hér á landi sem í útlöndum. „Ég verð að segja fyrir sjálfan mig að ég hef aldrei verið mikið fyrir að berast á," sagði Halldór og bætti við að hann væri ósköp venjlegur fjölskyldumaður. Hann væri ekki að fara frá starfi sínu með fúlgur fjár. Þá sagðist Halldór aðspurður ekki óttast hvítbók um bankana sem forsætisráðherra hefði boðað heldur fagnaði hann henn. Enn fremur sagðist hann tilbúinn að koma að þeirri vinnu að byggja Ísland aftur upp.

Sóttist eftir starfi Landsvirkjunar.

Fram kom í þættinum að Markaðurinn hefði heimildir fyrir því að Halldór hefði tilkynnt samstarfsmönnum sínum í Landsbankanum það að hann hefði sóst eftir starfi forstjóra Landsvirkjunar sem auglýst var nýverið. Hann hefði hins vegar verið beðinn um að sitja áfram í stóli bankastjóra vegna erfiðra aðstæðna.

Halldór sagði um þetta að hann hefði verið mikill áhugamaður um uppbyggingu orkuiðnaðarins og hann teldi að hann yrði mikil og sterk stoð fyrir Íslendingar. Hann hefði alveg verið tilbúinn að skipta um starfsvettvang. Aðspurður hvort hann sæi eftir því að hafa ekki hætt hjá Landsbankanum sagði Halldór að hann vissi ekki hvað skyldi segja, hann væri ánægður með að hafa verið á sínum póst.