Ríkisendurskoðun segir gæðaeftirlit með grunnskólum ábótavant

Gæðaöryggi er að mörgu leyti ábótavant í íslensku grunnskólakerfi, segir Ríkisendurskoðun í nýrri stjórnsýsluúttekt. Vísbendingar séu til dæmis um að árangur nemenda í tilteknum skólum sé endurtekið langt undir meðaltali á samræmdum prófum. Lögum samkvæmt skuli menntamálaráðuneytið hafa eftirlit með þessu en mikið skortir á að gripið sé til aðgerða þegar úrbóta er þörf.

Ríkisendurskoðun telur að Jöfnunarsjóður sveitarfélaga gæti nýst í því ferli, til dæmis með því að veita framlög sem taki mið af „þyngd" skólasvæða eða með úrbótum í gæðamálum. Hingað til hafi sjóðurinn ekki verið nýttur á þennan hátt. Þá telur Ríkisendurskoðun nauðsynlegt að menntamálaráðuneytið setji skýr markmið varðandi grunnskólann og viðmið um árangur.