Yfirvinnulaun Jakobs eru jafn há kennaralaunum

Föst yfirvinnulaun Jakobs Frímanns Magnússonar eru jafn há meðalheildarlaunum nýútskrifaðs grunnskólakennara.

Samkvæmt upplýsingum sem Fréttablaðið hefur eftir Halli Páli Jónssyni mannauðsstjóra Reykjavíkurborgar fær Jakob 236 þúsund krónur í fasta yfirvinnu. Sú tala bætist við 474 þúsund krónur sem Jakob hefur fyrir að gegna starfi framkvæmdastjóra miðborgarmála hjá Reykjavíkurborg.

Þær upplýsingar fengust hjá skrifstofu Kennarasambands Íslands að miðað við núgildandi kjarasamninga hefði nýútskrifaður grunnskólakennari að meðaltali um 210 þúsund krónur í grunnlaun á mánuði. Við grunnlaunin bætast um 26 þúsund krónur í yfirvinnu og heildarlaunin nýútskrifaðs grunnskólakennara, yngri en 30 ára, gætu því verið um 236 þúsund á mánuði.

Garðar Hilmarsson, formaður Starfsmannafélags Reykjavíkurborgar, sagði við Vísi í morgun að tölvupóstar og símhringingar hefðu streymt inn á skrifstofu Starfsmannafélags Reykjavíkurborgar vegna frétta af ráðningakjörum Jakobs Frímanns Magnússonar.