Forðaði stórslysi með naumindum

Litlu munaði að vörubíll félli ofan í Langadalsá í Ísafirði, en bíllinn vóg salt á brúarkantinum. Þetta varð með þeim hætti að ökumaður jeppa ætlaði sér yfir einbreiða brúna þó svo vörubíllinn væri það nálægt henni að ekki hefði verið nokkur leið að stöðva hann.

Til að forða stórslysi beygði ökumaður vörubílsins því úr vegi fyrir jeppanum. Snjótönn undir vörubílnum náði að skorða hann á brúarkantinum og forða því að hann félli sex metra ofan í ána, í hyl sem þar er undir. Af ökumanni jeppans er það að segja að hann var á það mikilli ferð að hann náði ekki að stöðva fyrr en 200 metrum eftir að hann ók yfir brúna. Eftir orðaskipti við ökumann vörubílsins ók hann á brott.