Stemmning á opnu húsi í Borgarleikhúsinu

Sannkölluð hátíðarstemmning ríkti í Borgarleikhúsinu í dag en talið er að ríflega sjö þúsund gestir hafi lagt leið sína þangað á opið hús. Fjöldi glæsilegra skemmtiatriða var í boði, heitar nýbakaðar vöfflur runnu ljúft ofan í mannskapinn, boðið var upp á skoðunarferðir um húsið, auk þess sem opnar æfingar voru á öllum sviðum og í hverju horni var eitthvað spennandi að sjá.

Fólk á öllum aldri upplifði töfra leikhússins, fékk að gægjast baksviðs og fékk forsmekk að þeim sýningum sem brátt verða á fjölunum svo fátt eitt sé nefnt. Aldrei hafa fleiri lagt leið sína í Borgarleikhúsið á opið hús en nýlega var starfsár leikhússins kynnt og óhætt að segja að viðtökur hafi farið fram úr björtustu vonum. Áskriftarsala er þegar orðin meiri en undanfarin ár og til að mynda seldust fleiri áskriftarkort á síðustu viku en allt síðasta ár. Sala á einstakar sýningar, svo sem Fló á skinni, hefur slegið fyrri met.