Segir gagnrýni Bílamarkaðarins ekki rétta að öllu

Dagur Jónasson, framkvæmdastjóri Bílalands, segir gagnrýni Þrastar Karelssonar, framkvæmdastjóra Bílamarkaðarins í Kópavogi, á verðlagningu notaðra bifreiða, sem birtist í grein á Vísi í gær, ekki að öllu leyti réttmæta. Þröstur tiltók sérstaklega Bílaland sem selur notaða bíla fyrir Ingvar Helgason og Bifreiðar og landbúnaðarvélar. Neðst á þessari síðu er hlekkur sem vísar á þá frétt.

„Þetta snýst í raun um tvennt: Þetta viðmiðunarverðkerfi sem Bílgreinasambandið gefur út og bílaumboðin standa að. Þar er um að ræða þetta ásetta verð sem bílasalar setja í glugga bílanna. Svo er hins vegar hægt að finna út úr þessu viðmiðunarverðkerfi raunsöluverð.

Þetta er í raun engin ákveðin regla, menn eru með mjög misjafnar aðferðir við að verðleggja bíla. Sumir hafa verðið hærra og gefa meiri afslætti, aðrir hafa það lægra og gefa minni afslætti. Þetta viðmiðunarverð sem er gefið út er þetta svokallaða gluggaverð sem er sett á spjald inn í bílana," útskýrir Dagur.

Verðlagningin ansi skrautleg í ár

Dagur segir kerfið svo reikna út raunsöluverð ákveðinna bíla þar sem liggja þurfi að baki ákveðinn fjöldi bíla til að hægt sé að reikna þetta út. „Þetta raunverð er þá farið að nálgast eitthvað sem er raunverulegt á markaði. Hins vegar auglýsum við alltaf viðmiðunarverðið. Verðlagning á bílum það sem af er þessu ári er búin að vera ansi skrautleg. Nýir bílar hafa hækkað um 35 - 40 prósent og ef nýr bíll hækkar í verðlista hjá bílaumboði hækkar viðmiðunarverðið í Bíló [rafrænt sölukerfi] og hækkar þar með alla notaða bíla sem þar með eru orðnir allt of dýrir enda hefur markaðurinn sýnt það í sumar að hann er bara ekki tilbúinn að taka þessu.

Kappkosta að hafa þessa hluti rétta

Það sem við gerum því núna er að setja þetta ásetta verð á þessa bíla og gefum svo dúndurafslátt. Ég er búinn að selja núna á tveimur vikum 360 bíla og neytendur á Íslandi láta ekki blekkjast. Þeir kaupa bara þegar verðið er gott. Ég viðurkenni það alveg fúslega að ég hefði getað verið með einhverja þrjá, fjóra, fimm bíla vitlaust verðlagða í fleiri hundruð bíla lager," segir Dagur.

Hann bætir því við að þetta komi í raun út á eitt þar sem bílarnir sem Þröstur tiltekur sérstaklega séu ekki seldir. „Ég hef tekið þessa bíla sem hann var að benda okkur á í síðustu viku og leiðrétt þá. Ég er alveg fyrsti maður til að viðurkenna það, ég kappkosta að hafa svona hluti rétta. Ég er búinn að vera að kenna löggildinguna og er í prófnefnd bifreiðasala og ég er ekki vísvitandi að blekkja neytendur, það er af og frá. Ég fagna því hins vegar auðvitað að Þröstur skuli fylgjast með og benda mönnum á þetta," segir Dagur að lokum.