Langþráð ný bryggja Grundfirðinga

Ný bryggja í Grundarfjarðarhöfn sem ber nafnið Miðgarður var vígð nú í vikunni og var vígsluathöfnin hin hátíðlegasta, að sögn Jónasar Guðmundssonar, kynningarfulltrúa bæjarins.

Eftir stutt ávarp Guðmundar Inga Gunnlaugssonar bæjarstjóra klipptu þeir Sturla Böðvarsson, forseti Alþingis, Jóhannes Sverrisson frá Siglingastofnun og Hafsteinn Garðarsson, hafnarvörður Grundarfjarðarhafnar, á vígsluborðann. Að því loknu fór sr. Aðalsteinn Þorvaldsson með bæn og blessaði mannvirkið. Að lokinni athöfn var móttaka í samkomuhúsi Grundarfjarðar þar sem gestir nutu veitinga í boði Grundarfjarðarhafnar.

Ákvörðun um smíði Miðgarðs var tekin árið 2004 og hófust framkvæmdir í júlí árið 2006. Í Miðgarði eru um 300 tonn af stáli, 720 m² af steypu og 38.000 m² af kjarna og grjóti. Miðgarður leysir Litlubryggju af hólmi, sem bæði var smá og farin að láta á sjá, en hún er orðin 65 ára gömul.