Aldrei meira tekið af hassi en í ár

Um 14 þúsund hegningarlagabrot voru framin á árinu ef marka má bráðabirgðatölur frá Ríkislögreglustjóra. Brotum hefur fjölgað um sjö prósent frá síðasta ári og um tæp fjögur prósent frá árinu 2006. Árið 2004 var þó sýnu verst í þessu sambandi en þá voru hegningarlagabrot um 16.500. Fjöldi umferðarlagabrota var um 55.500 á árinu sem er svipaður fjöldi og árið 2004 en síðustu ár hafa þau verið um 50 þúsund að meðaltali.

Ef litið er til fíkniefnabrota kemur í ljós að flest voru þau framin á þriðja ársfjórðungi eða 449 en á árinu öllu var lagt hald á 233 kíló af hassi sem er mun meira magn en áður hefur verið lagt hald á á einu ári. Lagt var hald á 6,5 kg. af maríhúana sem er meira magn en síðustu sex ár og 7,7 kg. af kókaíni sem er rúmu kílói meira en lagt var hald á í fyrra. Þá var lagt hald á tæp 11 kíló af amfetamíni sem er minna magn en síðustu tvö ár.

Nánar má fræðast um afbrotatölur hér.