Hafró leggur til að veidd verði 500 tonn af rækju í Arnarfirði

Rækjustofninn í Arnarfirði virðist hafa náð sér verulega á strik og leggur Hafrannsóknarstofnun til að veiðar verði stundaðar þar í vetur veidd verði 500 tonn. Þetta er niðurstaða haustkönnunar Hafrannsóknarstofnunar sem er nýlokið. Hafrannsóknarstofnun segir að á öðrum svæðum sé of lítið rækjumagn og mikið af ungfiski einkum ýsu. Þorskur eins árs og eldri sé undir meðaltali síðustu 10 ára á öllum svæðum. Hins vegar hafi verið mikið af ýsu eins árs og eldri á öllum svæðum. Einnig hafi talsvert orðið vart við lýsu.

Hafró segir hins vegar að samkvæmt fyrstu niðurstöðum um fjölda þorskseiða virðist 2008 árgangur þorsks slakur og svipaður og árið 2007. Fyrstu merki um 2008 árgang ýsu bendi hins vegar til að sá árgangur sé yfir meðaltali á grunnslóð, þó aðeins minni en 2007 árgangurinn hafi verið árið 2007.