Arnbjörg er voða vond segir Mogginn

Morgunblaðið skýrir frá því í dag að Arnbjörg Sveinsdóttir formaður þingflokks Sjálfstæðisflokksins stjórni með svo harðri hendi að þingmenn séu að verða brjálaðir.

Ólgan sé svo mikil að hún sé farin að berast útfyrir þingflokksherbergi Sjálfstæðisflokksins. Arnbjörg er sögð vilja ráða því hvenær þingmenn flokksins taka til máls á Alþingi og líka hverjir það eru sem fá að tala.

Vísir gerði vísindalega könnun á því hvernig þessu væri háttað í öðrum flokkum.

Katrín Jakobsdóttir, vara þingflokksformaður Vinstri grænna, veltist um af hlátri þegar hún var spurð. "Það vita nú allir að það er vonlaust að fá okkur Vinstri græn til þess að hætta að tala. Enda hefur það ekkert verið reynt," sagði Katrín.

Jón Magnússon, vara-þingflokksformaður Frjálslyndaflokksins hló einnig. "Ég er nú svo heppinn að vera í aðeins fjögurra manna þingflokki og þar eru engar skorður lagðar á hvenær menn tala. Miklu frekar leggja menn á ráðin um hið gagnstæða. En flokksræði í Sjálfstæðisflokknum kemur mér ekki á óvart."

"Æ,æ, ég vil ekki tala illa um Sjálfstæðisflokkinn," sagði Össur Skarphéðinsson, samfylkingarráðherra í ríkisstjórninni. "En ég minnist þess aldrei að hafa heyrt um að mönnum væri bannað að taka til máls á þingi. Menn eru frekar hvattir til þess að tala en þegja."

Guðni Ágústsson, formaður Framsóknarflokksins skellti uppúr. "Vandinn er líklega sá að það eru alltof margir í þingflokki Sjálfstæðisflokksins. Hjá okkur eru allir fjrálsir að því að tala þegar þeir vilja. Við utandagskrárumræður er stundum aðeins hægt að koma tveimur að og þá er það bara samkomulagsatriði. Þeir tala þá sem best eru að sér í viðkomandi máli, vegna nefndasetu eða annars."