Staðfest farbann yfir rúmenskum sjónhverfingamönnum

Hæstiréttur hefur staðfest farbannsúrskurð yfir tveimur Rúmenum sem ásamt þriðja landa sínum eru grunaðir um að reyna að svíkja fé út úr verslunum og bönkum hér á landi með nokkurs konar sjónhverfingum.

Mennirnir voru stöðvaðir við iðju sína í upphafi mánaðarins en samkvæmt gæsluvarðhaldsúrskurði höfðu þeir farið á 14 staði á suðvesturhorninu og svikið eða reynt að svíkja út fé. Mennirnir báðu starfsfólk um að skipta fimm þúsund króna seðlum og þegar peningarnir vortu komnir á borðið hættu þeir við og reyndu að hirða þúsund krónu seðlana sem starfsfólkið hugðist afhenda þeim.

Mennirnir þrír eru á aldrinum 28-41 árs og eru í farbanni fram á fimmtudag. Samkvæmt gæsluvarðhaldsúrskurðinum neita þeir sök.