Áform um störf án staðsetningar sýndarmennska?

30. janúar 2008 14:29

Deilt var um það á Alþingi í dag hvort hugmyndir ríkisstjórnarinnar um störf án staðsetningar væru sýndarmennska eða hvort raunverulegur vilji væri til þess að flytja opinber störf út á landi.

Bjarni Harðarson, þingmaður Framsóknarflokksins, vakti athygli á því við upphaf þingfundar að gert væri ráð fyrir tiltekið starf í tengslum við Vatnajökulsþjóðgarð ætti að vera á höfuðborgarsvæðinu en ekki heima í héraði.

Sagði Bjarni að nota ætti hugtakið störf án staðsetningar til þess að draga störf til borgarinnar. Spurði Bjarni Lúðvík Bergvinsson, þingflokksformann Samfylkingarinnar hvort þetta væri í anda stefnu ríkisstjórnarflokkanna um störf án staðsetningar.

Lúðvík svaraði því til að hugmyndin um störf án staðsetningar væri að færa opinber störf sem hægt væri að vinna annars staðar en á höfuðborginnni út á land. Hann hefði talið að umrætt starf vegna Vatnajökulsþjóðgarðs yrði á Hornafirði og hann teldi að iðnaðarráðherra væri sömu skoðunar. Benti Lúðvík á að starfshópur á vegum fjármálaráðuneytis og iðnaðarráðuneytis ynni að verkefninu störf án staðsetningar með 40 stofnunum sem heyrðu undir 11 ráðuneyti.

Steingrímur J. Sigfússon, formaður Vinstri - grænna, vísaði til umræðu á þinginu í gær þar sem fram hefði komið að einn af umsækjendum um starf ferðamálastjóra hefði óskað eftir því að vinna starfið frá starfsstöð stofunnar á Akureyri. Hann hefði fengið þau svör að iðnaðarráðuneytið vildi starfið í Reykjavík. Spurði Steingrímur hvort hugmyndir ríkisstjórnarinnar um að fjölga opinberum störfum á landsbyggðinni væri bara sýndarmennska og sagði ekkert að gerast í málunum.

Ármann Kr. Ólafsson benti hins vegar á að sjávarútvegsráðuneytið hefði fjölgað störfum úti á landi í gegnum undirstofnanir sínar, þar á meðal Matís, Hafrannsóknastofnun og Fiskistofu. Þá hefði störfum á vegum menntamálaráðuneytis fjölgað í gegnum meðal annars háskólastofnanir úti á landi. Benti Ármann á að það væri ekki síður mikilvægt að ýmis fyrirtæki á almennum markaði skilgreindu störf sín sem störf án staðsetningar.

Katrín Júlíusdóttir, þingmaður Samfylkingarinnar, andmælti orðum Steingríms og sagði ekki rétt að ekkert væri að gerast í þessu verkefni ríkisstjórnarinnar. Verkefnið væri að fara af stað og hún væri sannfærð um að það færi á mikla ferð og myndi móta starfshætti ríkisins á næstu mánuðum og árum. Vísaði hún einnig til starfshópsins á vegum fjármála- og iðnaðaráðuneytis sem myndi vinna að framgangi málsins.

Mest lesið

Fleiri fréttir