Borgin lætur taka út kynbundinn launamun

Borgarstjórn samþykkti á fundi sínum í dag með öllum greiddum atkvæðum þá tillögu borgarfulltrúa Vinstri - grænna að láta fara fram óháða úttekt á kynbundnum launamun hjá Reykjavíkurborg.

Í greinargerð með tillögunni er vísað til þess að könnun á vegum stéttarfélagsins SFR sýndi á dögunum að kynbundinn launamunu hjá hinu opinbera hefði aukist. „Sú staðreynd veldur áhyggjum. Hér er lagt til að Reykjavíkurborg sem atvinnurekandi láti fara fram launakönnun hið fyrsta sem varpar ljósi á stöðu starfsfólks borgarinnar hvað þetta varðar. Niðurstaða könnunarinnar verði lögð fram í borgarráði svo fljótt sem auðið er.

Meginmarkmiðið með því að könnunin sé gerð af utanaðkomandi aðila, rannsóknarstofnun eða fyrirtæki er sú að niðurstöðurnar séu sambærilegar þeim sem fram hafa komið í nýlegum könnunum verkalýðsfélaganna.," segir í tilkynningu Vinstri - grænna.

Þá er bent á að verið sé að bæta úrvinnslu þessara gagna í ráðhúsinu á vegum mannauðsskrifstofu í því skyni að upplýsingar sem þessar liggi fyrir. Miklar væntingar séu bundnar við þá vinnu enda muni þær upplýsingar verða gott tæki til að sporna enn frekar gegn kynbundnum launamun.