Fimm ára fangelsi fyrir hrottafengin kynferðisbrot

Héraðsdómur Reykjavíkur hefur dæmt tvo Litháa, Arunas Bartkus og Rolandas Jancevicius, í fimm ára fangelsi fyrir að hafa í sameiningu með ofbeldi reynt að nauðga konu og neytt hana til að hafa við þá munnmök.

Árásin átti sér stað í miðborg Reykjavíkur í nóvember síðastliðnum. Hlaut konan ýmsar rispur og mar á líkama, svo hart gengu þeir fram.

Konan hitti mennina á veitingastað í bænum og var samferða þeim upp Laugaveginn. Þeir réðust hins vegar á hana í húsasundi á Laugaveginum á hrottafenginn hátt.

Mennirnir neituðu sök fyrir dómi og bar annar þeirra fyrir sig minnisleysi vegna ölvunar en hinn sagði samfarir hafa farið fram með vilja konunnar. Dómurinn mat framburð hans ekki trúverðugan en sagði framburð konunnar hafa verið stöðugan allan tímann. Voru þeir því sakfelldir fyrir brot sín.

Eiga sér engar málsbætur

Litháarnir tveir, sem eru 32 og 28 ára, eiga báðir dóma að baki í heimalandi sínu, meðal annars fyrir fjárkúgun og þjófnað og rán. Var litið til þess og þess hversu hrottafengin árás mannanna var, bæði í ljósi kringumstæðna og þeirra svívirðilegu og niðurlægjandi aðferða sem þeir beittu og þess gríðarlega sálartjóns sem þeir ollu henni.

Hafi þeir sýnt fullkomið skeytingarleysi fyrir líðan hennar, kynfrelsi og æru, þegar þeir veittust að henni í bílskýlinu, notfærðu sér og hlógu að bjargarleysi hennar, auðsýndu einbeittan ásetning til að koma fram vilja sínum og skirrðust einskis, þrátt fyrir beiðni hennar um miskunn, segir í dómnum.

„Hefur annar þeirra síðan borið við minnisleysi um atburði og hinn með auvirðilegum hætti vænt X um falska kæru, sem rót eigi að rekja til fjárgræðgi og vonbrigða með samfund við ákærðu í umræddu rými, um miðja nótt í þriggja stiga hita, og að auki gefið í skyn að hún hafi hlotið áverka á kynfærum við samræði með óskyldum aðila, í kjölfar samskipta við ákærðu. Að gættum öllum þessum atriðum er það ekki aðeins álit dómenda, að ákærðu hafi unnið til þungrar refsingar og eigi sér engar málsbætur heldur einnig, að þyngja beri refsingu þeirra sérstaklega í ljósi samverknaðar, sbr. 2. mgr. 70. gr. almennra hegningarlaga," segir í dómnum.

Auk fimm ára fangelsis voru þeir dæmdir til að greiða konunni tvær milljónir króna í miskabætur.