Verð frekar hækkað í lágvöruverslunum

Henný Hinz, hagfræðingur hjá ASÍ, segir að það vekji óneitanlega athygli að matarverð hafi hækkað mest í lágvöruverslunum undanfarna þrjá mánuði.

,,Þegar verðið hækkar á annað borð þá kannski til að missa ekki alveg niður veltuna í dýrari verslunum er frekar hægt að hækka verðið í lágvöruverslunum," segir Henný.

Mest er 8% hækkunin í Bónus og í Krónunni þar sem matarverð hefur hækkað um 6,5%. Mikil hækkun hefur orðið á stuttu tímabili samkvæmt könnun verðlagseftirlits ASÍ sem fór hófst í apríl og stóð fram í júní.

Henný segir að kaupmáttur almennings hafi rýrnað. ,,Við höfum verið að sjá þetta gerast og umræðan hefur verið mikil," segir Henný og bætir við að hækkanir undanfarna mánuða hafi áhrif á aðra neyslu. ,,Fólk eyðir meira í nauðsynjar og þar af leiðandi minna í annað. Magnið breytist hugsanlega ekki en fólk verslar ódýrari vörur ef það getur komið því við."

Henný segir mikilvægt að neytendur fylgist með verðlagsbreytingum og sé miðvitað um hækkanir á matvörum.