Umdeild mörk KR-inga gegn ÍA (myndband)

KR vann í gær 2-0 sigur á ÍA en bæði mörkin sem komu í leiknum þóttu umdeild. Nú er hægt að skoða mörkin hér á Vísi.

Garðar Örn Hinriksson, dómari leiksins, segist standa við alla sína dóma í leiknum í gær, meira að segja eftir að hafa skoðað atvikin í sjónvarpi.

Grétar Sigurðarson skoraði fyrra mark KR með skalla eftir hornspyrnu. Boltinn lenti aldrei inn í markinu en aðstoðarmaður dómara úrskurðaði svo að hann hefði farið inn fyrir línuna áður en Espen Madsen, markvörður ÍA, sló boltann úr markinu.

Skagamenn mótmæltu þessu mjög og sagði Guðjón Þórðarson, þjálfari ÍA, í viðtali eftir leikinn að sínir menn fullyrða að boltinn hefði aldrei farið inn fyrir línuna.

Ljósmynd sem birtist á forsíðu íþróttablaði Morgunblaðsins sýnir að mjög líklega hafi boltinn farið inn fyrir línuna og tekur Garðar undir það.

„Það er reyndar ekki ég sem dæmi í þessu atviki heldur aðstoðardómarinn. En það sást mjög vel á þessari mynd að boltinn var inni. Ég fæ ekki betur séð en að þetta sé réttur dómur."

Síðara markið skoraði Björgólfur Takefusa af stuttu færi, aftur eftir hornspyrnu. Pétur Marteinsson skallaði boltann að marki og Björgólfur fylgdi skotinu á eftir og kom boltanum yfir línuna.

Skagamönnum þykir hins vegar Pétur brjóta á Heimi Einarssyni er hann skallar boltann. Bjarni Guðjónsson, fyrirliði ÍA, mótmæltu þessu mjög og fékk að líta gula spjaldið fyrir. Skömmu síðar fékk hann aftur gult og þar með rautt.

Lesendur Vísis geta sjálfir dæmt um hvort að mörkin hafi verið lögleg.