Verðbólgan nærri 16 prósent

Verðbólga í október reyndist 15,9 prósent og jókst um 1,9 prósentustig frá septembermánuði. Þetta sýna nýjar tölur Hagstofunnar sem í dag birti vísitölu neysluverðs fyrir október. Hún hafði hækkað um 2,16 prósent á milli mánaða.

Spár greiningardeilda Glitnis og Kaupþings gerðu ráð fyrir 15,8 og 15,7 prósenta verðbólgu. Það sem knýr áfram verðbólguna nú er hækkun á mat og drykkjarvöru um 4,3 prósent og og verðhækkun á fötum og skóm um tæp fimm prósent. Verð á húsgögnum, heimilistækjum, heimilisbúnaði o.fl. hækkaði um 7,1 prósent, á varahlutum og hjólbörðum um nærri fimmtung, á flugfargjöldum til útlanda um nærri 19 prósent og verð á sjónvörpum, dvd-spilurum, tölvum o.fl. hækkaði um rúm tíu prósent.

Verð á bensíni og díselolíu lækkaði hins vegar um 3,4 prósent og þá lækkaði kostnaður vegna eigin húsnæðis um 1,3 prósent. Þar af voru áhrif af lækkun markaðsverðs -0,24 prósent en áhrif af hækkun raunvaxta voru 0,03 prósent.

,,Nýskráningar bifreiða hafa nánast stöðvast af efnahagsástæðum. Í ljósi þessa er ekki tekið tillit til breytinga á listaverði bíla frá september, en það hefði hækkað bifreiðalið vísitölunnar um 4,1% (áhrif 0,30%)," segir í frétt Hagstofunnar.

Sem fyrr segir er verðbólgan 15,9 prósent á ársgrundvelli og 17,8 prósent ef ekki er tekið tillit til húsnæðisþáttarins.