Kópavogsbær veitir ráðgjöf í kreppunni

Kópavogsbær hefur opnað vefsíðuna Hönd í hönd til að vekja athygli á „margháttaðri og samþættri" þjónustu fyrir Kópavogsbúa í tengslum við ráðgjafaver sem sett var á laggirnar vegna hruns á fjármálamarkaði, eins og segir í tilkynningu.

„Síminn í ráðgjafaverið er 800-5500. Að átakinu standa meðal annars auk Kópavogsbæjar prestar í Kópavogi, Menntaskólinn í Kópavogi, heilsugæslan, Kópavogsdeild Rauða krossins og mæðrastyrksnefnd Kópavogs," segir einnig.

Þá segir að ráðgjafaverið leitist við að veita íbúum sem glíma við vanlíðan og erfiðleika vegna ástandsins stuðning og leiðsögn. „Í ráðgjafaveri svara félagsráðgjafar, prestar og sálfræðingar símanum og veita liðsinni sitt. Þar er einnig hægt að fá upplýsingar um hvert er hægt að leita eftir frekari aðstoð."

Hnappur sem leiðir inn á vefinn er á heimasíðu Kópavogsbæjar, www.kopavogur.is