Geir segir ekki tímabært að ræða ESB-aðild

Geir H. Haarde forsætisráðherra vill bíða með að ræða Evrópusambandsaðild þar til Íslendingar eru komnir í gegnum mestu erfiðleikana. Þetta kom fram í máli hans á blaðamannafundi eftir fund norrænu forsætisráðherranna í Helsinki í dag. Þar var meðal annars rætt um stöðu mála á Íslandi og fór Geir formlega fram á lán frá nágrannaþjóðunum.

Fyrr í dag sagði Björgvin Sigurðsson viðskiptaráðherra að bankahrunið á Íslandi kallaði á endurskoðun í Evrópumálum og að Íslendingar ættu að íhuga að sækja um Evrópusambandsaðild og taka upp evru til þess að bregðast við kreppunni. Vísaði Björgvin meðal annars í nýja skoðanakönnun Fréttablaðsins sem sýnir að hátt í 70 prósent vilja nú sækja um aðild að ESB og yfir 70 prósent vilja taka upp evru.

Geir sagði hins vegar að nú væri ekki rétti tíminn til að sækja um Evrópusambandsaðild. ,,Ég tel að við verðum að ræða það þegar við erum komin í gegnum þessa kreppu. Við erum daga og nætur við krísustjórnun," sagði Geir samkvæmt International Herald Tribune. ,,Við erum að reyna að leysa alvöru vandamál nú, öll okkar: ríkisstjórnin, Alþingi, bankarnir og önnur fyrirtæki," sagði Geir enn fremur.