Ráðherra beri virðingu fyrir störfum Jóhanns

Lögreglufélag Suðurnesja lýsir yfir miklum vonbrigðum með þá ákvörðun Björns Bjarnasonar dómsmálaráðherra að auglýsa embætti lögreglustjórans á Suðurnesjum laust til umsóknar. Þetta kemur fram í tilkynningu frá félaginu.

Segir félagið enn fremur að ákvörðun ráðherra eigi sér engin fordæmi og sé ekkert annað en uppsögn. Jóhann Bendiktsson, núverandi lögreglustjóri, sé mikill liðsmaður lögreglunnar í landinu og hans mikli áhugi á löggæslumálefnum hafi haft smitandi áhrif á þá lögreglumenn sem starfa hjá lögreglunni á Suðurnesjum.

,,Þessi mikli áhugi og dugnaður Jóhanns hefur lagt hornstein að þeim góða árangri sem hefur skapast hér við embættið. Er það einlæg ósk okkar að dómsmálaráðherra beri tilhlýðilega virðingu fyrir störfum Jóhanns svo að þeir lögreglumenn sem starfa við embætti lögreglunnar á Suðurnesjum fái starfsfrið til áframhaldandi góðra verka," segir einnig í tilkynningunni.