Hjálpargögn Rauða krossins komin til Burma

Þrátt fyrir erfiðleika við að koma neyðarvarningi til Burma lenti flugvél Rauða krossins hlaðin hjálpargögnum í Yangoon höfuðborg Burma (einnig þekkt sem Rangoon í Burma) seint í gærkvöldi. Flogið var frá neyðarbirgðastöð Alþjóða Rauða krossins í Kuala Lumpur. Önnur vél með hjálpargögn fylgdi í kjölfarið nú í morgun.

Alþjóðlegir sérfræðingar Rauða krossins eru að störfum í Burma og von er á enn fleiri sendifulltrúum til að styrkja Rauða krossinn í neyðaraðgerðunum. Um 27.000 sjálfboðaliðar Rauða krossins í Burma hafa haldið hjálparstarfinu uppi frá því hamfarirnar urðu fyrir einni viku. Sérfræðingar frá systurfélögum Rauða krossins í nágrannaríkjunum sem eru sérþjálfaðir í neyðarviðbrögðum á svæðinu eru þegar komnir til landsins.

Utanríkisráðuneytið veitti í gær 7,7 milljónir íslenskra króna í hjálparstarf Alþjóða Rauða krossins á hamfarasvæðunum. Áður hafði 10 milljóna króna framlag frá Rauða krossi Íslands verið sent til hjálparstarfsins og stendur söfnun Rauða krossins enn yfir.

„Það er mjög mikilvægt að fá stuðning sem þennan frá ríkisstjórninni og almenningi til að koma að aðstoð strax á fyrstu stigum hjálparstarfsins," segir Kristján Sturluson, framkvæmdastjóri Rauða kross Íslands. „Þetta framlag sýnir einnig samhug íslensku þjóðarinnar með nauðstöddum íbúum í Mjanmar [Burma]."

Rauði krossinn mun notast jafnt við leiguflug og venjulega flugfrakt til að koma nauðsynlegum hjálpargögnum sem fyrst til Burma og mun einnig leitast við að koma neyðarvarningi frá nágrannaríkjunum landleiðina inn í landið.

Þeim sem vilja styðja fórnarlömb fellibylsins er bent á vefsíðuna raudikrossinn.is, reikning hjálparsjóðs Rauða krossins í banka 1151, hb. 26, reikning 12, kt. 530269-2649, og söfnunarsímann 907 2020. Við hvert símtal gjaldfærast 1.200 kr. á næsta símreikning.

Þetta kemur fram í fréttatilkynningu frá Rauða krossinum.