Háskólakennarinn áfrýjar ekki - Hefur afplánun í dag

53 ára háskólakennari sem nýlega var dæmdur í 4 ára fangelsi fyrir kynferðisbrot gegn sjö stúlkum ætlar að una dómnum. Verjandi hans, Oddgeir Einarsson, sendi ríkissaksóknara bréf í gær þar sem honum var tilkynnt þetta.

Að sögn Oddgeirs var það vilji skjólstæðings hans að ljúka málinu og því ákvað hann að una dómnum. Gæsluvarðhald yfir háskólakennaranum rann út í dag en hann hefur um leið afplánun á fangelsisdómnum.

Auk hans var maðurinn dæmdur til þess að greiða fórnarlömbum sínum miskabætur. Hæstu miskabæturnar fékk stjúpdóttir mannsins, eða tvær milljónir.

Ákæran á hendur manninum var í 22 liðum en hann var ákærður fyrir brot gegn sjö stúlkum, þar á meðal gegn dætrum sínum og stjúpdóttur.

Í upphafi snerist rannsókn lögreglunnar að meintri misnotkun háskólakennarans á tveimur dætrum hans, stjúpdóttur og fjórum vinkonum þeirra. Síðar bættust tvö uppkomin börn hans, sem hann á með fyrri konu sinni, við hóp kærenda.

Lögregla hætti hins vegar rannsókn á þeim málum þar sem þau eru fyrnd. Því var ekki ákært vegna þeirra.

Níu mál voru því rannsökuð en sjö þeirra leiddu til ákæru.

Brotin sem háskólakennarinn er dæmdur fyrir eru gróf að mati héraðsdóms sem segir hann hafa misnotað sér sakleysi stúlknanna. Þá kemur fram í dómnum að framburður mannsins hafi einkennst af því að hann vilji draga úr ábyrgð sinni og varpa þeim yfir á þolendur misgjörða sinna.

Á móti kemur að kennarinn hefur ekki gerst brotlegur áður.