Samkomulag lækna hljómar ekki sérstakt

Samninganefnd Læknafélags Íslands og samninganefnd ríkisins komust að samkomulagi um nýjan kjarasamning síðdegis í dag og var skrifað undir nýjan samning hjá ríkissáttasemjara í kvöld.

,,Ég á eftir að sjá smáa letrið en þetta hljómar ekki beisið," sagði Ragnar Freyr Ingvarsson formaður Félags ungra lækna í samtali við Vísi. Hann vildi að öðru leyti ekki tjá sig um samkomulagið fyrir hann hefði náð að fara betur yfir það.

Fyrr í kvöld sagði Gunnar Ármannsson, formaður samninganefndar Læknafélagsins, hér á Vísi að samningurinn feli í sér 6% meðaltalshækkun launa.

Samningstíminn er 1. september til 31. mars 2009. Læknafélagið telur eðlilegt að semja til skemmri tíma miða við núverandi stöðu í efnahagsmálum þjóðarinnar.

Í júlí felldu félagsmenn í Læknafélaginu kjarasamning við ríkið með 57% gildra atkvæða. Mikil óánægja var með ungra lækna með samninginn og sagði Ragnar í samtali við Vísi 30. júní að samningurinn gerði ráð fyrir 4,15% launahækkun sem hefði falið í sér kjaralækkun að hans mati.