Ráðherra hunsi vilja Húsafriðunarnefndar

Samband ungra sjálfstæðismanna vill að menntamálaráðherra hafni ósk Húsafriðunarnefndar um friðun húsanna á Laugavegi 4-6. Þetta kemur fram í áskorun sem SUS sendi ráðherra í dag.

Þar segir að undirbúningur að uppbyggingu á viðkomandi reit hafi staðið yfir um margra ára skeið bæði að hálfu eigendanna og borgarinnar. Deiliskipulag svæðisins hafi verið kynnt, rædd og samþykkt innan borgarkerfisins. Íbúum hafi gefist tækifæri á að gera athugasemdir við byggingaráformin og eigendur lóðarinnar hafi sýnt mikla viðleitni í þá átt að taka tillit til þeirra.

Þá sé nýlega lokið heildarvinnu við friðun húsa á Laugaveginum og hafi umrædd hús ekki á verið á þeim lista sem friða átti. Niðurstöður þeirrar vinnu megi skoða í svokölluðum Laugavegsbæklingi sem gefinn var út árið 2005.

„Það er því algjörlega ótækt að draumur eigenda húsanna og Reykvíkinga um uppbyggingu á reitnum sé nú í uppnámi vegna skyndilegs viðsnúnings Húsafriðunarnefndar. Það mun reynast miðbænum banabiti ef fjárfestar og verslunareigendur eiga það á hættu að margra ára undirbúningsvinna verði að engu korteri áður en framkvæmdir eiga að hefjast," segir í áskorun SUS til ráðherra.