Þorskkvóti aukinn um fimmtung í Barentshafi

Samkomulag hefur náðst á milli Norðmanna og Rússa um að auka þorskkvóta í Barentshafi um 20% frá yfirstandandi ári. Kvótinn verður 525.000 tonn fyrir árið 2009. Þetta kemur fram í tilkynningu frá Landssambandi útgerðarmanna.

Hlutdeild Íslands í leyfilegum heildarafla þorsks er 1,85%, sem svarar til ríflega 9.700 tonna upp úr sjó.

,,Atle Vartdal, stjórnarmaður í Fiskebat og einn norsku samninganefndarmannanna, segir um 20% aukninguna að þar liggi traust vísindaleg rök að baki. Því hafi verið vikið frá þeirri stjórnunarreglu fyrir næsta ár að kvóta mætti ekki auka um meira en 10%. Hann undirstrikar að reglunum verði fylgt á nýjan leik árið 2010," segir í tilkynningunni.