Nær jafnmargir með og á móti umhverfismati Bakkaálvers

Capacent kannaði í síðasta mánuði afstöðu almennings til uppbyggingar álvera, orkufreks iðnaðar og ákvörðunar Þórunnar Sveinbjarnardóttir, umhverfisráðherra, að framkvæmdir við fyrirhugað álver Bakka við Húsavík fari í sameiginlegt umhverfismat.

Þar kemur fram að 42% styðja ákvörðun Þórunnar en 41% eru á móti. Tæp 60% Samfylkingarfólks styður ákvörðunina en 28% eru henni andvíg. Meirihluti stuðningsmanna Vinstri grænna, eða ríflega 75%, styðja ákvörðunina. Mest andstaða er meðal framsóknarmanna en 89% þeirra eru andsnúnir ákvörðun Þórunn. Þá eru 62% stuðningsmanna Sjálfstæðisflokksins einnig á móti ákvörðun Þórunnar.

Meirihluti landsmanna eða 54% er hlynntur uppbyggingu orkufreks iðnaðar en fleiri á landsbyggðinni miðað við höfuðborgarsvæðið. Naumur meirihluti er andvígur frekari uppbyggingu álvera. Uppbygging gagnavera og netþjónabúa nýtur hins vegar stuðnings 85% landsmanna. 67% eru fylgjandi útrás íslenskra orkufyrirtækja.