Vilja að íslensk stjórnvöld leggist gegn eldflaugavarnakerfi

Þrír þingmenn Vinstri - grænna hafa lagt fram þingsályktunartillögu á Alþingi þar sem lagt er til að Alþingi feli ríkisstjórninni að mótmæla áformum Bandaríkjamanna og eftir atvikum NATO að koma upp eldflaugavarnakerfi í Austur-Evrópu.

Í tillögunni kemur fram að þessum mótmælum eigi að koma til skila á vettvangi NATO og annars staðar þar sem við eigi í alþjóðasamstarfi. Þá vilja þingmennirnir þrír, þau Steingrímur J. Sigfússon, Katrín Jakobsdóttir og Árni Þór Sigurðsson, að Ísland beiti sér fyrir því með virkum hætti að gildandi samningar um afvopnun eða takmörkun vígbúnaðar verði virtir.

Í greinargerð með tillögunni er bent á að Bandaríkjamenn semji nú við Pólverja og Tékka um að koma upp eldflaugavarnakerfinu en þetta sé hluti af stjörnustríðsáætluninni svokölluðu. ,,Óvinsældir áætlunarinnar eru hins vegar svo miklar að hún hefur ekki gengið undir sama nafni lengur en tíu ár í senn," segir tillöguhöfundar.

Segja þeir óumdeilt að uppsetning eldflaugavarnakerfisins sé ekki til þess fallin að stuðla að afvopnun og friðsamlegri sambúð þjóða. Þvert á móti séu eldflaugavarnir líklegar til að stuðla að frekara vígbúnaðarkapphlaupi. Benda tillöguhöfundar á að Rússar hafi svarað þessum fyrirætlunum með því að segja upp samningnum um takmörkun hefðbundins vígbúnaðar í Evrópu og jafnvel gefið í skyn að þeir muni aftur reyna að staðsetja kjarnorkuvopn á Kúbu.

,,Hætta er á því að sú afvopnunarstefna á sviði kjarnorkuvígbúnaðar, sem átt hefur að heita við lýði frá lokum kalda stríðsins, heyri þar með brátt sögunni til," segir einnig í greinargerð með þingsályktunartillögunni.