Bjargað úr brennandi báti á Skjálfanda

Mannbjörg varð í morgun þegar tveimur skipverjum af fiskibátnum Sigurpáli ÞH-130 var bjargað af brennandi báti á Skjálfanda.

Fram kemur í tilkynningu Landhelgisgæslunnar að hún hafi fengið tilkynningu um eldinn laust eftir klukkan tíu. Stjórnstöð Gæslunnar hafði samband við bátsverjana og sagði þeim sjósetja björgunarbát. Haft var samband við nærstödd skip og báta sem voru beðin um að stefna á staðinn. Björgunarbátur Slysavarnafélagsins á Húsavík, Jón Kjartansson, var einnig kallaður á staðinn ásamt slökkviliði.

Um hálfellefu voru skipverjarnir tveir komnir um borð í björgunarbát Slysavarnarfélagsins en slökkviliðsmenn fóru um borð í Sigurpál og vinna nú við að slökkva eldinn. Björgunarbáturinn Jón Kjartansson er nú á leið í land að sækja fleiri slökkviliðsmenn og bíða aðrir bátar og skip átekta. Sigurpáll ÞH-130 er 26 tonna eikarbátur smíðaður á Akureyri 1972.