Útlendur öldungur aftur tekinn með fíkniefni í Norrænu

Karl á sjötugsaldri hefur verið úrskurðaður í gæsluvarðhald til 16. september eftir að fíkniefni fundust í bíl hans við komu Norrænu til Seyðisfjarðar í dag.

Fíkniefnadeild lögreglunnar á höfuðborgarsvæðinu sem tekið hefur við rannsókn málsins af tollgæslu og lögreglu eystra segir að maðurinn sé af erlendu bergi brotinn. Rannsókn málsins er á frumstigi og ekki er unnt að veita frekari upplýsingar að svo stöddu.

Lögregla á Seyðisfirði greindi þó frá því að um talsvert magn fíkniefna væri að ræða en unnið var að málinu í samstarfi við færeysku lögregluna.

Þetta er í annað sinn í sumar sem aldraður útlendingur er tekinn með mikið magn fíkniefna við komuna til landsins með Norrænu. Í byrjun júní var Hollendingur á sjötugsaldri handtekinn eftir að um 190 kíló af fíkniefnum fundust í húsbíl hans. Hann situr nú í gæsluvarðhaldi vegna málsins ásamt Þorsteini Kragh tónleikahaldara.