AFL kærir þýska vertinn

AFL starfsgreinafélag hefur kært árás vertsins á Cafe Margret á Breiðdalsvík, Horst Muller, á Sverri Má Albertsson framkvæmdastjóra félagsins. Í frétt í 24 stundum á dögunum greint frá því að veitingamaðurinn borgi veitingastúlkum sínum lág laun auk þess sem þau séu ekki gefin upp til skatts. Í fréttinni var vitnað í Sverri og sárnaði Horst það svo mjög að hann lagði á sig 160 kílómetra ökuferð til þess eins að ráðast á hann.

Í tilkynningu frá AFLi segir að það sé með öllu ólíðandi að að starfsmenn félagsins séu í þeirri stöðu að ráðist sé á þá vegna starfa þeirra. Árásin verði því kærð.

Þá hyggst félagið senda sýslumanni beiðni um að „rannsakað verði til hlítar hvort lög um atvinnuréttindi útlendinga, lög um skyldutryggingar lífeyrisréttinda, lög um slysatryggingar launafólks, lög um aðbúnað og hollustuhætti á vinnustöðum, skattalög svo önnur þau lög sem virða þarf við starfsmannahald séu haldin á veitingastaðnum Cafe Margreti við Breiðdalsvík." Ástæður þessa séu fullyrðingar vertsins um að starfsmenn AFLs stundi atvinnuróg. Með þessari rannsókn vonast félagið til að það skýrist hver er með rógburð.

Horst vísaði vegna tungumálaörðugleika á eiginkonu sína, Margret Bekemeier, þegar Vísir leitaði viðbragða hans. Margrét sagði þau enga skoðun hafa á kærunni. Málinu væri lokið af þeirra hálfu. Þau væru Sverri reið, enda hefði hann farið með ósannindi og eyðilagt mannorð þeirra.