Grunuðum kynferðisbrotamanni sleppt

Þrjátíu og þriggja ára gömlum karlmanni, sem handtekinn var í síðustu viku og úrskurðaður í gæsluvarðhald vegna gruns um kynferðisbrot gegn fósturdóttur sinni, hefur verið sleppt.

Gæsluvarðhald yfir honum rann út í dag og að sögn Björgvins Björgvinssonar, yfirmanns kynferðisbrotadeildar lögreglunnar, voru rannsóknarhagsmunir ekki lengur fyrir hendi og því var ekki farið fram á áframhaldandi varðhald. Lögregla muni ljúka rannsókn málsins og senda það svo til ríkissaksóknara til ákvörðunar um saksókn.

Eins og fram kom í Fréttablaðinu á laugardag er maðurinn grunaður um að hafa brotið alvarlega gegn stúlkunni sem nú er þrettán ára. Talið er að brotin hafi staðið yfir í einhvern tíma.

Lögregla rannsakaði einnig hvort maðurinn hefði brotið gegn öðrum börnum og var skýrsla tekin af þremur börnum í tengslum við málið. Að sögn Björgvins kom ekkert fram við þær skýrslutökur sem bendir til þess að maðurinn hafi brotið gegn öðrum börnum.