Vilja aðgerðir strax til að vernda kaupmátt

Framkvæmdastjórn Starfsgreinasambands Íslands segir að grípa þurfi tafarlaust til aðgerða til vernda kaupmátt launafólks.

Bresti forsendur kjarasamninga þá lýsi framkvæmdastjórnin fullri ábyrgð á hendur ríkisstjórninni vegna aðgerðarleysis hennar. Í ályktun sem samþykkt var á fundi framkvæmdastjórnarinnar lýsir hún yfir mikilli óánægju með þróun efnahags- og verðlagsmála frá því kjarasamningar voru undirritaðir 17. febrúar.

„Meginmarkmið samninganna var að tryggja kaupmátt og stöðugleika í efnahagsmálum og þar tók launafólk á sig mikla ábyrgð. Gengishrun, ofurvextir og verðbólga langt um fram markmið Seðlabanka og forsendur kjarasamninga setja nú fjárhag heimilanna í uppnám. Þessar aðstæður kalla nú þegar á samráð aðila vinnumarkaðarins og stjórnvalda til lausnar á þeim vanda sem við blasir," segir enn fremur í ályktun Starfsgreinasambandsins.