Hanna Birna: Tíminn vinnur með okkur

„Þetta er allt á réttri leið og augljóst að tíminn vinnur með okkur. Ég átti alltaf von á því að það tæki tíma að vinna fylgið aftur," segir Hanna Birna Kristjánsdóttir um nýja skoðanakönnun á fylgi við meirihluta Sjálfstæðisflokks og framsóknarmanna í borgarstjórn.

Samkvæmt nýjum Þjóðarpúlsi Gallup eru 56% borgarbúa andvígir nýjum meirihluta í borginni. Þetta eru töluvert skaplegri tölur fyrir nýja meirihlutann en sést hafa í könnunum hingað til. Í könnun Capacent sem Stöð 2 birti þann 25. ágúst voru um 63% andvígir meirihlutanum. I könnun sem Fréttablaðið birti þann 17 ágúst síðastliðinn voru 73,8% andvíg meirihlutanum.

Hanna Birna segist vera þakklát fyrir það persónulega fylgi sem hún hafi fengið en 40% þeirra sem svöruðu sögðust vera ánægðir með Hönnu Birnu í embætti borgarstjóra. Þriðjungur sagðist vera óánægður með hana en þriðjungur sagðist hvorki vera ánægður né óánægður með hana. Fylgið við Hönnu Birnu er töluvert umfram það sem forveri hennar hafði.