Jón Gerald aðstoðaði við gerð FL Group myndbanda

Jón Gerald Sullenberger segist ekki vera huldumaðurinn á bakvið FL Group myndböndin tvö sem birt hafa verið á vefsíðunni Eyjunni, það seinna nú á laugardaginn.

„Nei ég er ekki huldumaðurinn. En ég þekki hann og hef verið honum til aðstoðar við gerð þessara myndbanda," segir Jón Gerald sem lengi hefur eldað grátt silfur saman við Jón Ásgeir Jóhannesson sem um tíma var einn aðaleigandi FL Group.

Myndböndin sem um ræðir fjalla á meðal annars um viðskipti FL Group með flugfélagið Sterling.

Þau er hægt að sjá hér og hér

Sterkur orðrómur hefur verið um að Jón Gerald hafi gert myndböndin en hann heldur meðal annars úti sérstakri heimasíðu um Baugsmálið. Þetta segir Jón Geral ekki alveg rétt.

„Það er ekki ég sem geri þessi myndbönd. Ég hef hins vegar verið þeim sem gerir myndböndin innan handar til dæmis með því að taka saman upplýsingar. Og ég get upplýst það hér og nú að það eru fleiri myndbönd á leiðinni," segir Jón Gerald en Vísir ræddi við hann í dag þar sem Jón var staddur á heimili sínu á Flórida.