Forsetinn fundaði með Yunus í Bangladess

Ólafur Ragnar Grímsson, forseti Íslands, tók um helgina þátt í alþjóðlegu þingi um loftslagsbreytingar í Bangladess þar sem hann flutti lokaræðuna.

Þar kynnti hann meðal annars hugmyndir sínar um stofnun sérstaks Himalayaráðs sem vakti mikla athygli og þá lýsti hann hvernig bráðnun jökla á norðurslóðum ógnar nú öryggi og lífsháttum íbúa í Asíu en um tveir milljarðar manna búa við eða nærri ströndum álfunnar.

Í tilkynningu frá forsetaembættinu kemur einnig fram að forsetinn hafi fundað með helstu ráðamönnum Bangladess og Muhammad Yunus, friðarverðlaunahafa Nóbels, sem unnið hefur ötullega gegn örbirgð í heiminum með örlánum í gegnum Grameen-bankann svokallaða. Ólafur Ragnar Grímsson heimsótti höfuðstöðvar bankans í Dakka.