Hermenn og stríðstól á Keflavíkurflugvelli

Varnaræfingin Norður-Víkingur verður sett eftir tæpa klukkustund. Fjöldi hermanna og stríðstóla tekur þátt í æfingunni.

Æfingin stendur til 5. september og er í samræmi við varnarsamning Íslands og Bandaríkjanna frá árinu 2006. Liðsflutningar til og frá landinu verða æfðir auk loftvarna landsins en æfingarnar fara fram á hafsvæðinu umhverfis landið.

Það er Varnarmálastofnun Íslands sem stýrir æfingunni ásamt Evrópuherstjórn Bandaríkjanna. Flugsveitir frá Bandaríkjunum, Noregi og Kanada taka þátt í æfingunni auk þess sem ratsjárvél frá Atlantshafsbandalaginu kemur að henni.

Samhliða þessu hefst regluleg loftrýmisgæsla Atlantshafsbandalagsins í samræmi við ákvörðun NATO og íslenskra stjórnvalda frá síðasta ári. Bandarísk flugsveit hóf þá gæslu í dag og sinnir henni til 20. þessa mánaðar. Fyrsta verkefnið af þessu tagi var þegar frönsk flugsveit var hér á landi í maí og júní.

15 orrustuþotur, 2 ratsjárvélar, 3 eldsneytisáfyllingarvélar og 2 kafbátaleitarvélar taka þátt í æfingunni að þessu sinni.