Aðgerðum vörubílstjóra lokið

Aðgerðum vörubílstjóra við Alþingishúsið er lokið en þangað komu þeir um hádegisbil og þeyttu flautur bíla sinna. Lögregla kom fljótlega á vettvang og varð að samkomulagi að bílstjórar færu eftir að hafa verið um 45 mínútur á vettvangi.

Þingfundur stóð sem hæst þegar vörubílstjórar hófu að þeyta flautur sínar en það hafði ekki áhrif á þingstörf því þingmenn héldu áfram að flytja ræður sínar úr ræðustól Alþingis.

Þetta voru fyrstu mótmæli vörubílstjóra frá því að til átaka kom á Suðurlandsvegi fyrir um tveimur vikum. Sturla Jónsson, talsmaður vörubílstjóra, sagði í samtali við Vísi vörubílstjóra langt í frá af baki dottna og í gær hefði verið fundað um frekari aðgerðir. Vörubílstjórar héldu fast í kröfur sínar um lægra eldsneytisverð og breytt vinnutímaákvæði.

Sturla segir viðmót lögreglu hafa verið allt annað en á Suðurlandsvegi fyrir tveimur vikum og því hafi allt gengið vel. Hann segir aðgerðir munu halda áfram.