Breyttur útivistartími hjá börnum og unglingum

Útivistartími barna og unglinga tekur breytingum í dag. Nú mega 12 ára börn og yngri vera úti til klukkan átta á kvöldin en 13 til 16 ára unglingar mega vera úti til klukkan tíu.

Bregða má út af reglunum fyrir síðartalda hópinn þegar unglingar eru á heimleið frá viðurkenndri skóla-, íþrótta- eða æskulýðssamkomu eins og segir í tilkynningu lögreglunnar.

Reglum um útisvistartíma er meðal annars ætlað að tryggja nægan svefn en hann er börnum og unglingum nauðsynlegur. Svefnþörfin er einstaklingsbundin en þó má ætla að börn og unglingar á grunnskólaaldri þurfi 10 tíma svefn á nóttu segir lögregla.

Hún hvetur foreldra enn fremur til þess að fylgja því eftir að börn og unglingar fái nægan svefn. Í því felist meðal annars að ganga úr skugga um að þau séu ekki í tölvunni þegar þau eiga að vera komin í rúmið.