Fimm mánaða tafir á tvöföldun Reykjanesbrautar?

Framkvæmdir við tvöföldun Reykjanesbrautar gætu frestast um allt að fimm mánuði náist ekki samkomulag við undirverktaka um framhald þeirra. Fulltrúar Vegagerðarinnar, Jarðvéla og undirverktaka þeirra funda um framtíð verkefnisins í dag.

Samkvæmt útboðsskilmálum átti framkvæmdum við tvöföldun Reykjanesbrautar að vera lokið um mitt næsta sumar. Verktakafyrirtækið Jarðvélar sagði sig hins vegar frá verkinu í lok síðasta árs vegna fjárhagsörðugleika og síðan þá hafa framkvæmdir legið niðri.

Vegagerðin hefur óskað eftir því að undirverktakar Jarðvéla, verktakafyrirtækið Eykt og Malbikunarstöðin Höfði, klári verkefnið. Fulltrúar fyrirtækjanna og Vegagerðarinnar hittast á fundi í dag til að freista þess að ná samkomulagi um framtíð verkefnisins.

Jónas Snæbjörnsson, svæðisstjóri Vegagerðarinnar, sagði í samtali við fréttastofu stefnt að því að ljúka framkvæmdum þann 1. október næstkomandi. Fari hins vegar svo að ekki náist samkomulag í dag verði að bjóða framkvæmdina út að að nýju. Að sögn Jónasar mun það hafa í för með sér frekari tafir upp á allt fjóra til fimm mánuði miðað við áætluð verklok.