Sífellt álag á rannsóknardeild lögreglunnar

„Ég veit ekki hvað segja skal - ég veit ekki hvað er eðlilegur tími fyrir rannsókn af þessum toga," segir Friðrik Smári Björgvinsson, yfirlögregluþjónn hjá lögreglunni á höfuðborgarsvæðinu. 24 stundir greindu frá því í dag að mikið álag á lögreglu í sumar hefði tafið rannsókn á ofbeldi föður gegn þremur börnum. Umfjöllun fjölmiðla hafi komið málinu af stað á ný.

Það var Fréttastofa Stöðvar 2 og Vísis sem sagði fyrst frá málinu á miðvikudag í síðustu viku. Málið er eitt það alvarlegasta sem barnaverndayfirvöld hafa fengist við enda um langvarandi ofbeldi gagnvart börnunum að ræða. Eitt þeirra var meðal annars notað sem hnífaskotskífa. „Í þessu tilfelli þurfti að fá börnin í skýrslutökur fyrir dómi og þess háttar. Það er spurning um hvað telst óeðlilegur tími," segir Friðrik Smári. Hann segir að málinu muni ljúka á morgun og síðan verði tekin ákvörðun um framhaldið á ákærusviði Lögreglustjórans á höfuðborgarsvæðinu.

Hann segir ekki hafa verið óeðlilega mikið álag á rannsóknardeild lögreglunnar í sumar. „En það er mikið álag á rannsóknardeildinni, hefur verið og verður," segir Friðrik. Hann bendir á að hjá rannsóknardeild lögreglunnar þurfi starfsmenn sín sumarleyfi og eðlilega hægist því á öllu á sumrin.