Þung orð spilla ekki fyrir góðri samstöðu í borgarstjórn

Ólafur F. Magnússon, nýr borgarstjóri, sagðist ekki líta svo á að þau þungu orð sem fallið hefðu síðustu daga myndu spilla fyrir góðri samstöðu í borgarstjórn. Í fyrstu ræðu sinni sem borgarstjóri þakkaði hann fráfarandi meirihluta fyrir samstarfið og óskaði Birni Inga Hrafnssyni, sem hætti sem borgarfulltrúi í dag, velfarnaðar á nýjum vettvangi.

Ólafur sagði orrahríðina í stjórnmálum oft harða og því hafi menn fengið að kynnast eftir að tilkynnt var um nýjan meirihluta í borginni. Stór orð hefðu fallið og hann skildi tilfinningar manna en hann liti ekki svo á að orðin spilltu fyrir góðri samstöðu í borgarstjórn.

Nýr meirihluti myndi vinna að framgangi sinna mála og samkvæmt sinni sannfæringu. Hann hefði alla tíð lagt áherslu á að fylgja eigin sannfæringu og fylgja eftir þeim stefnumálum sem kjósendur hefðu falið honum.

Nýr meirihluti tæki við við erfiðar aðstæður en hann myndi láta verkin tala og væri staðráinn í að vinna vel að brýnustu hagsmunum borgarinnar.

Ólafur sasgðist ekki vilja tala um þær persónulegu árásir sem hann hefði orðið fyrir en vildi heiðarlega umræðu. Honum þætti afar vænt um borgina og myndi vinna í þágu allra borgarbúa.

Eins og kunnugt er hófst borgarstjórnarfundurinn klukkan 12.15 að viðstöddum miklum fjölda andstæðinga nýs meirihluta. Gerðu þeir hróp að nýjum borgarstjóra og var gripið til þess ráðs á endanum að gera hlé á fundinum á meðan pallarnir voru rýmdir. Fundurinn hófst aftur um klukkan tvö og stendur nú yfir kosning í nefndir og ráð borgarinnar.