Öllu starfsfólki Kjötbankans sagt upp í gær

Öllu starfsfólki Kjötbankans, um 20 manns, var sagt upp störfum í gær. „Fyrirtækið verður að losa samninga sem í gildi eru til að geta farið út í breytingar á rekstrinum og skipulagsbreytingar svo laga megi fyrirtækið að framtíðinni," sagði Haukur Hjaltason, eigandi Kjötbankans.

Haukur sagði fyrirtækið þó ekki á leið í gjaldþrot. „Þarna starfar frábært gengi góðra sérfræðinga í kjötvinnslu og frábært starfsfólk og það á bara skilið að fyrirtækið verði endurskipulagt þannig að það skili arði og góðum launum til frambúðar," sagði Haukur enn fremur. Hann sagði nánast allt starfsfólkið njóta þriggja mánaða uppsagnarfrests og enginn væri að fara strax. „Við ræddum við starfsmennina í gær og lögðum fram þá ósk okkar að menn yfirgæfu ekki fyrirtækið á þessum tíma en við myndum heldur ekki hamla neinum sem hefði að öðru starfi að hverfa," útskýrði Haukur.

Hann sagðist ekki eiga von á að þetta raskaði starfsemi fyrirtækisins, ráðstafanirnar væru lífsnauðsynlegar fyrir framtíð fyrirtækisins sem nú hefur starfað í 25 ár. „Þetta var afar erfið stund hjá mér í gær, ég get alveg sagt þér það," sagði Haukur og tók það fram að megináhersla hans væri á að gera ferlið eins þægilegt og unnt væri fyrir starfsfólk Kjötbankans, þetta væri viðkvæm stund og honum væri ákaflega annt um starfsfólk sitt og hag þess.