Guðný Halldórsdóttir bæjarlistamaður Mosfellsbæjar

Guðný Halldórsdóttir kvikmyndagerðarmaður var útnefnd bæjarlistamaður Mosfellsbæjar 2008 við hátíðlega viðhöfn í gærkvöldi þegar bæjarhátíð Mosfellsbæjar, Í túninu heima, var sett með pompi og pragt.

Guðný sagðist, þegar hún veitti viðurkenningunni móttöku, vera afar þakklát og snortin yfir því að vera sýndur þessi heiður. „Rétt eins og Árni Johnsen er atvinnu-Vestmannaeyingur, er ég atvinnu-Mosfellingur," sagði hún og uppskar hlátur viðstaddra.

Þetta er í fjórða sinn sem bæjarhátíð Mosfellsbæjar, Í túninu heima, er haldin og hefur hátíðinni vaxið ásmegin ár frá ári. Hátíðin stendur yfir í fjóra daga, hófst á fimmtudagskvöld og lýkur á sunnudagskvöld. Hápunktur hátíðarinnar er í kvöld þegar stórtónleikar verða haldnir á torginu í miðbæ Mosfellsbæjar þar sem fram koma fjöldinn allur af listamönnum, svo sem hljómsveitin Buff, Ingó, Raggi Bjarna, Sigga Beinteins, Simmi og Auddi og Gunni og Felix. Af því tilefni býður Mosfellsbær frítt í leið 15 í allan dag.

Meðal þess sem er á dagskrá hátíðarinnar í dag og á morgun eru útimarkaðir í Álafosskvos og Mosfellsdal, rokktónleikar í Álafosskvos, hátíðardagskrá í Íþróttahúsinu að Varmá, Laxnesskvöld á sunnudag og margt fleira.