Heimsókn Önnu Jóhannsdóttur af allt öðrum toga

Gréta Gunnarsdóttir, alþjóðaskrifstofu utanríkisráðuneytisins, segir regin mun vera á heimsóknum Bjarna Vestmann og Önnu Jóhannsdóttir til Sri Lanka. Vefmiðillinn Eyjan sagði frá því fyrr í dag að Anna, sem er yfirmaður íslensku friðargæslunnar hafi farið í samskonar ferð og Bjarni fyrir réttu ári síðan.

Anna hitti í þeirri ferð einn af leiðtogum Tamíltígra rétt eins og Bjarni gerði á þriðjudaginn. Heimsókn Bjarna varð til þess að yfirvöld á Sri Lanka kvörtuðu til íslenska utanríkisráðuneytisins og ræddu utanríkisráðherrar landanna málið í gærkvöldi. Í framhaldi af þeim fundi sendu íslensk stjórnvöld afsökunarbreiðni til stjórnvalda á Sri Lanka.

Gréta segir ekki hægt að jafna heimsóknum þeirra Bjarna og Önnu saman. Í tilfelli Önnu hafi tilgangurinn beinlínis verið að hitta forystumenn stríðandi afla í landinu. Það hafi hins vegar ekki verið ákveðið að Bjarni myndi hitta leiðtoga Tamíltígra.

Á vefmiðlinum Colombo Page á Sri Lanka er sagt frá því í dag að atvikið frá því á þriðjudag hafi haft áhrif á störf norrænu vopnaeftirlitssveitarinnar í dag. Til hafi staðið að fara inn á yfirráðasvæði Tamíltígranna en við þá ferð hafi verið hætt þegar liðsmenn sveitarinnar neituðu að fallast á að stjórnarhermenn leituðu í bílum þeirra.