Ráðstafanir hérlendis vega fuglaflensu

Rannsókn á orsökum þess að kalkúnar á bresku alifuglabúi smituðust af fuglaflensu stendur yfir en talið er líklegast að veiran hafi borist með farfuglum. Viðbragðshópur landlæknis ræður ráðum sínum um aðgerðir síðdegis.

Vel gengur að slátra 160.000 fuglum á alifuglabúi Bernard Matthews, stærsta kalkúnaframleiðanda Evrópu, í Holton í Suffolkhéraði á Englandi en fyrir helgi var greint frá því að um 2.500 fuglar væru hefðu drepist þar af völdum flensuveiru af stofninum H5N1.

Í morgun mátti sjá hvítklædda verkamenn með grímur og hanska hlaða kalkúnum inn í bíla fyrir utan búið og leiða þá til slátrunar. Sérstök neyðarnefnd breskra stjórnvalda mun hittast í dag og ræða frekari aðgerðir en búið er að setja öll bú í þriggja kílómetra radíus í sóttkví og láta starfsmönnum Holton-búsins flensulyf í té.

Rannsókn á smitinu stendur yfir en allar líkur eru á að sýktir farfuglar hafi valdið smitinu. Hér á landi fylgjast yfirvöld grannt með framvindunni og í dag fundar viðbúnaðarhópur Landbúnaðarstofnunar um málið. Ekki er þó talið að mikil hætta sé á ferðum þar sem engir farfuglar eru á þessu svæði í Bretlandi sem koma til Íslands, auk þess sem þeir byrji ekki að koma til landsins fyrr en þegar líður á febrúar.