Sauðkindin er alltaf á móti

„Við erum bara sveitó og það er einfaldlega flott að vera þannig," segir Fanný Guðbjörg Jónsdóttir, kosningastjóri Samtaka ungra Framsóknarmanna, en þeir notast við íslensku kindina í kosningaherferð sinni. Hafa skreytt skrifstofu, bíl og annan varning tengdan kosningabaráttunni með þessu ágæta og bragðmikla spendýri.

„Við byrjuðum á þessu í kosningabaráttunni 2003 en vildum núna fara alla leið," bætir Fanný Guðbjörg við en ungir framsóknarmenn hafa jafnframt opnað heimasíðuna kind.is.

Framsóknarkindin hefur hins vegar þótt æði lík annari kind sem hefur lifað góðu lífi í bolabúðinni Ósóma og þar á bæ könnuðust menn við að aðilar úr Framsóknarflokknum hefðu haft samband og óskað eftir einhvers konar samstarfi. „Við ýttum því bara á undan okkur og svöruðum því aldrei beint nema helst að við vildum vera ópólitísk enda er sauðkindin ekki pólitísk, hún er bara á móti," segir Gunnlaugur Ingivaldur Grétarsson í Ósóma og samstarfskona hans, Þordís Claessen tekur undir þau orð.

„Okkur finnst þetta hins vegar fyndin tilviljun en getum auðvitað ekkert gert, við erum ekki með einkaleyfi á íslensku kindinni," segir Þordís sem vill þó gjarnan bjóða landbúnaðarráðherranum og framsóknarmanninum Guðna Ágústssyni í búðina til þeirra þar sem ráðherrann myndi þiggja einn bol með kindinni. „Enda myndum við afhenda honum hann með glöðu geði," segir Þórdís. „Landbúnaðarráðherrann hefur enda sýknt og heilagt verið að reyna vernda íslensku kindina með misjöfnum hætti þó," bætir Gunnlaugur við.

anný Guðbjörg kannaðist vel við Ósóma-kindina og sagðist vera stolt af því að búðin hefði tekið eftir þessu tákni árið 2003 og nýta sér það.