Dafnar eins og blómi í eggi

„Ég hef það alveg frábært. Og dafna eins og blómi í eggi,“ segir hin 44 ára gamla fegurðar­drottning Unnur Steinsson, sem er ólétt að sínu fjórða barni. Unnur, sem er komin rúmlega fimm mánuði á leið, segir að fyrstu mánuðirnir hafi verið erfiðir en síðan hafi þetta verið eintóm sæla.

Unnur og maður hennar, Ásgeir Ásgeirsson, eiga von á barninu í lok október og ríkir mikil spenna og gleði á heimilinu. „Það brosa allir út að eyrum enda ekki annað hægt þegar svona óvæntur gestur kemur í heimsókn,“ segir Unnur, en fimmtán ár eru síðan hún var í þessum sporum síðast.

Hún veit kyn barnsins en segir hlæjandi að óþarfi sé að upplýsa það fyrir alþjóð að svo stöddu. Þau hjónin eiga hvort um sig þrjú börn fyrir. Unnur á alheimsfegurðardrottninguna Unni Birnu, sem er 23 ára, Steinar 21 árs og Vilhjálm 15 ára. Ásgeir á þrjár stelpur; Brynju 14 ára, Hörpu 17 ára og Rakel 23 ára. Börnin verða því sjö í lok október en Unnur kvíðir því ekki. „Er ekki sjö happatala?“ spyr hún hlæjandi að lokum.